Páskar - Samkaup Úrval

Tekið af www.blog.central.is/gauti

" Ég sagði frá því hérna fyrir ofan að við höfðum verslað í Bónus fyrir rúmar 20.000 krónur . Við keyptum allt milli himins og jarðar og gætum við lifað af aurskriðu úr fjallinu án þess að fara út í marga daga , svo góð er birgðastaðan í Glæsibæ , en það verður ekki sagt það sama um Samkaup Úrval hérna á Siglufirði.

Það er nánast ekki hægt að ákveða fyrirfram hvað maður ætlar að borða ef að maður þarf að versla í matinn þar. Fólk verður að fara á staðinn og standa við kjöborðið og helst með matreiðslubók með sér til að reyna að finna uppskrift að kjötbúðingsrétt eða bjúgum og hringja heim til að spyrja maka sinn hvort að hann vilji grillaðan kjötbúðing eða djúpsteikt bjúgu .

Þetta er yfirleitt undirstaðan í kjötborðinu , ásamt saltkjöti og sparskinku frá Goða.

Ég veit ekki hversu oft ég hef ákveðið að hafa eitthvað í matinn og þegar að upp í Samkaup er komið hef ég þurft að hætta við vegna þess að sá matur sem ég hef hugsað mér að borða er ekki til . Það verður seint sagt að Samkaup Úrval á Siglufirði standi undir nafni , úrvalslega séð.

Ég ætla að birta smá pistil hérna fyrir neðan , sem ég hef ég birt áður ; í febrúar 2006 en fékk mjög léleg svör að mínu mati og ætla ég því að gera aðra tilraun . Ég hef örlítið lagað hana til en annars stendur hún að mestu leyti eins og hún var upprunalega . Hún er þó nokkuð löng en ég hvet ykkur til þess að lesa hana á enda.

Ég hvet alla þá sem hingað líta inn . Alla þá sem eru á bakvið þessar 140 heimsóknir að segja sína skoðun , hvort sem það er undir nafni eður ei.

- - -

Föstudaginn 14. október, 2005 - Innlendar fréttir

Verslunarfélagið hætt starfsemi

Morgunblaðið/Örn Þórarinsson

Siglufjörður | Fyrir skömmu hætti Verslunarfélag Siglufjarðar starfsemi sinni. Félagið hafði rekið matvöruverslun í fimm ár allt frá því fyrirtækið keypti rekstur og húseign Verslunarfélagsins Ásgeirs í október árið 2000. Nú er aðeins ein matvöruverslun rekin af Samkaupum eftir á Siglufirði.

Guðmundur Gauti Sveinsson var verslunarstjóri hjá Verslunarfélaginu en bróðir hans og fjölskylda voru eigendur fyrirtækisins. Búið var að auglýsa rekstur og húsnæði til sölu en ekki reyndist áhugi hjá heimamönnum fyrir að kaupa eða leigja fyrirtækið.

Að sögn Guðmundar Gauta hafði reksturinn verið að dragast saman undanfarin misseri. Ástæður þess sagði hann einkum þrjár. Í fyrsta lagi hefði útgerð fiskiskipa frá Siglufirði minnkað verulega undanfarið og miklu minni viðskipti hefðu verið við loðnuflotann sem sáralítið hefur landað í Siglufirði undanfarið ár, en viðskipti við skipin voru verulega mikill þáttur í rekstrinum. Í öðru lagi gætu litlar verslanir úti á landi einfaldlega ekki keppt við stórmarkaðina í vöruverði. Þær hefðu ekkert bolmagn í slíka samkeppni. Guðmundur sagðist einfaldlega telja að dagar kaupmannsins á horninu væru senn taldir, enda væri það að sanna sig víðar en á Siglufirði. Í þriðja lagi hefði bæjarbúum verið að fækka undanfarin ár, ekki í stórum stökkum en um nokkra tugi á ári og slíkt teldi hvað verslun varðaði.

"Auðvitað er maður svekktur yfir að þurfa að hætta, en það er einfaldlega betri kostur en að reka eitthvað með tapi mánuð eftir mánuð, ekki síst þegar maður sér ekki fram á breytingu til batnaðar," segir Guðmundur Gauti að lokum.

- - -

Þetta viðtal var tekið við mig nokkrum dögum eftir að Verslunarfélag Siglufjarðar hætti rekstri . Núna er eitt og hálft ár liðið og hefur það liðið ótrúlega hratt. Margt hefur breyst , ég flutti suður , bjó hjá Svövu og Árna í Sóltúninu , kynntist Drífu , flutti til hennar og er fluttur heim aftur.

Ég vann í Rúmfatalagernum , í skiltagerð hjá Gunnari Trausta og núna á Fiskmarkaði Siglufjarðar en samt er ég alltaf að spá í matvörubransanum , sérstaklega hérna á Siglufirði þar sem mér finnst hann hafa farið aftur um marga áratugi eftir að Samkaup Úrval sat eftir eitt á markaðnum.

Fljótlega eftir að ég flutti suður , sá ég á vefnum hjá Steingrími , grein eftir Gísla Gíslason rekstrarstjóra Samkaups , þar sem hann vitnaði í grein eftir mig , þar sem ég óskaði Siglfirðingum til hamingju , til hamingju með að versla í dýrustu verslun Samkaups/Úrvals á Íslandi.

Grein Gísla var svo hljóðandi :

Sæll Steingrímur, -Var að skoða umræðuna inn á þínum ágæta vef og sá m.a. þó nokkuð rætt um verslunarmál á Siglufirði í tilefni að því að Verslunarfélagið var að loka um síðustu mánaðarmót.-- Guðmundur Gauti Sveinsson skrifar 12.sept. m.a. "... og verða Siglfirðingar að sætta sig við að versla við dýrustu Samkaup úrval verslunina á landinu..."  Þetta verð ég að biðja þig að leiðrétta á vef þínum.

Sannleikurinn er sá að það er sama verð í öllum Samkaup úrval verslununum á landinu. Við erum með verslanir í Njarðvík, Hafnarfirði, Borgarnesi, Ísafirði á Eyjafjarðarsvæðinu og á Húsavík o.fl. stöðum og verðið það sama allsstaðar, hvort það er í Njarðvík eða á Siglufirði.  ----  Við höfum verið að bera okkur saman í verðum við verslanir Hagkaupa og Nóatúns og höfum verið undir þeim eða í versta falli jafnir þeim í öllum síðustu verðkönnunum.   ----  Það er því ódýrara fyrir Siglfirðinga að versla í Samkaup úrval á Siglufirði heldur en að fara í Hagkaup Skeifunni eða einhverja Nóatúnsverslunina á Reykjavíkursvæðinu.  Með fyrirfram þökk fyrir að koma þessu á framfæri fyrir mig.  --  Bestu kveðjur til allra Siglfirðinga.  Gísli Gíslason rekstrarstjóri

- -

Gísli reyndi að telja fólki trú um að þetta væri allt saman bull og vitleysa sem ég sagði og sendi ég Steingrími svar , stuttu seinna en hann óttaðist ef að hann myndi birta það á vefnum , að til leiðinlegra orðaskipta myndi koma , en sagði að mér væri frjálst að birta það á umræðusvæðinu á www.sksiglo.is , sem og ég gerði svo á endanum og hljómaði svar mitt svona :

Ég var að renna yfir fréttirnar hjá þér síðustu daga og las þar grein eftir Gísla Gíslason Rekstrarstjóra Samkaups/úrval þar sem hann vitnar í grein eftir mig á www.siglo.is þar sem ég segi að ".. og verða Siglfirðingar að sætta sig við að versla við dýrustu Samkaup úrval verslunina á landinu.." og svo bætir hann við "

Sannleikurinn er sá að það er sama verð í öllum Samkaup úrval verslununum á landinu. Við erum með verslanir í Njarðvík, Hafnarfirði, Borgarnesi, Ísafirði, á Eyjafjarðarsvæðinu og á Húsavík o.fl. stöðum og verðið það sama allsstaðar, hvort það er í Njarðvík eða á Siglufirði."

Ég held að Gísli Gíslason verði að fara að vinna vinnuna sína betur því að 25 maí síðastliðinn gerði ASÍ verðkönnun í 63 verslunum um allt land.

Hér er brot úr fréttinni af vef ASÍ :

"Kannað var verð í 63 verslunum um land allt og var m.a. farið í keðjuverslanir sem eru með útibú víða á nokkrum stöðum á landinu.  Ósamræmi í verði milli verslana innan sömu keðju á mismunandi stöðum á landinu var mest í verslunum Samkaup-Úrval en þar var ósamræmi í verðum milli verslana í 18 tilvikum af 20.  Í verslunum Krónunnar var ósamræmi í 17 tilvikum, Samkaup Strax í 14 tilvikum og í verslunum Bónus og Kaskó var ósamræmi í 10 tilvikum.   Í öðrum keðjum var sjaldnar ósamræmi."

- - -

Ástæðan fyrir því að ég er að skrifa um þetta núna , er sú að mig langar að vita , til dæmis hvernig og- eða hvort vöruverð og þjónusta hefur breyst eitthvað síðan að Verslunarfélagið hætti og Samkaup/Úrval varð eitt með markaðinn.

Fólk hlýtur að hafa fundið fyrir einhverjum breytingum. Ég trúi ekki öðru. Ég veit að Verslunarfélagið var ekki ódýrasta verslunin á landinu , enda lögðum við aldrei upp með það að geta boðið upp á ódýrara vöruverð heldur en Bónus eða Samkaup , enda höfðum við ekki tækifæri á því . Þó svo að það hafi komið fyrir að Versló hafi stundum haft vinningin í verðum , en það var alltaf í mun minna mæli en hjá samkeppnisaðila okkar, Samkaup.

Þar sem við vorum kaupmaðurinn á horninu, áttum við ekki séns í þessa risa. Risarnir á markaðnum eru búnir að slátra flest öllum minni verslunum , þó svo að ein og ein sé ennþá lifandi , en ég spái því að þær verði ekki langlífar .

En eins og ég segi hérna ofar, þá langar mér að fá viðbrögð fá fólki . Viðbrögð um þessar breytingar , hvort að þetta hafi verið til góðs eða ills.

Er betra að hafa eina verslun ? Allt á einum stað ?
Hvernig er þjónustan ? Góð eða slæm ?
Hvernig er vöruúrvalið að þínu mati ?
Hvernig er vöruverðið á Siglufirði miðað við í nágrannabæjum okkar ?
Værir þú til í að hafa tvær verslanir á Siglufirði ? "

ggs